fbpx

فتة اللحم

فتة اللحم

طريقة التحضير

اول حاجه نعمل الرز و نسيبه علي جمب يهدي

اسخن مكس سمنه و زيت في حله و انزل الرز المتصفي و اشوح كويس و ارش بسيط اوي فلفل اسود و م ص ملح و ازود مياه فاتره لحد فوق الرز بعقله صباع و اسيبه علي نار عاليه و اول ميشرب المياه اوطي خالص و احط الشياطه

نيجي للحمه  نغسلها و نصفيها و في حله
اسخن سمنه و زيت و انزل اللحمه تتشوح كويس احمرها كده و معاه رشه فلفل اسود و بهارات بسيط اوي و ورق لورا و حبهان و بصله صحيحه عامله فيها شقوق و
اقلب لما تاخد لون ازودلها و اغطيها بمياه مغليه و اسيبها تغلي و تستوي و لو احتاجت مياه ازود و في نص السوا احط الملح
و لما الاقيها استوت اخد من الشوربه ديه حبه حلوين بكبايه كده اشيلها علي جنب و اسيب اللحمه تشرب اخر حبه شوربه و تتشوح فالصوص اللي هيكون تحت و تتحمر و اقفل عليها

و اعمل الصلصه اجيب ٧ فصوص توم مفرومين و اشوحهم في سمنه و اطشهم ب ٤ م ك خل و اقلب كويس و ارش رشه ملح و فلفل و كزبره ناشفه و اقلب و اشيل نص الكميه ديه علي جنب و في انزل علي الباقي بعصير الطماطم و الصلصه و ازود توابل اسيبها تتسبك و بس و اجيب طاسه و اشوح العيش في سمنه بلدي و كمون و ٣ فصوص توم كويس لحد ميتحمص

اغرف بقي اجيب البايركس و ارص العيش و اسقيه شوربه سخنه اوي كويس و اسيبه شويه يطري و بعدها اغرف رز و اسقيه كبشه شوربه و بعدها شويه من الطشه و شويه صلصه و بعدها اللحمه و باقي الصلصه و الطشه علي الوش و كلوا احلي فته بالخل و التوم

المكونات

  • ١ كوب ارز مصري مغسول و منقوع ١٥ دقيقه و متصفي
  • ١/٢ كيلو مكعبات كباب حلة  فريش و بلدي
  • ٢ رغيف بلدي مقطع مكعبات
  • ١٠ فصوص ثوم مفرومين
  • ٤ م ك خل
  • سمنه
  • ملح فلفل كمون بهارات لحمه ورق لورا حبهان بصله صحيحه
  • ٢ م ك صلصه
  • ٤ طماطم وسط معصورين

Share this post


Call Now Button
×